ढेड महिना नपुग्दै मुसहर बस्ती निर्माणको ५० प्रतिशत काम सकियो, दोश्रो तल्लाको भित्ता उठाउने काम सुरु

धुर्मुस सुन्तली फाउण्डेसनले निर्माण गरिरहेको एकिकृत नमुना मुसहर बस्तीको निर्माण कार्य ढेड महिना नपुग्दै आधा काम सकिएको छ । पौष २५ गते नेपालका चर्चित हास्यकलाकार महजोडि हरिवंश आचार्य र मदनकृष्ण श्रेष्ठले शिल्यानाश गरेका उक्त बस्तीको ४२ दिनमै ५० प्रतिशत काम सकिएको हो ।


लामो समयदेखी अशिक्षा, बेरोजगारी तथा पिछडिएका मुसहर बस्तीमा निर्माणधिन घरहरुको पहिल्लो तल्लाको काम सकिएको छ । मुसहर बस्ती निर्माणका परियोजना ब्यबस्थापक अर्जुन न्यौपानेले जानकारी दिएअनुसार अहिले बस्तीको ६ वटा घरहरुका पहिलो तल्लाको भित्रीे प्लास्टर सकिएको छ भने ४८ वटा घरको पहिलो तल्लाको काम सकिएको छ । ‘अब हामी छिट्टै बस्ती सकाउन सक्छौ, काम निकै तिव्रताका साथ अघि बढिरहेको छ’ परियोजना ब्यबस्थापक न्यौपानेले भने सबैको साथ र सहयोग पाए हामी नया बर्षमा बस्ती हस्तान्तरण गर्नेछौ’ ।

उता फाउण्डेसनका अध्यक्ष सितारम कट्टेल (धुर्मुस) र कुञ्जना घिमिरे (सुन्तली) अष्ट्रेलियाबाट फर्केलगत्तै लगातार बस्ती निर्माणमा खटिरहेका छन् । सबैको साथ र सहयोगले काम तिव्र अघि बढिरहेको बताउदै उनले अझै पनि श्रम सहयोगको लागी आग्रह गरेका छन् । ‘बस्ती निर्माणको काम जतिसक्दो छिटो सक्काउन पाए मुसहर बासीले खुसीको शास फेर्न पाउने थिए’ फाउण्डेसनका अध्यक्ष कट्टेलले भने, अहिले हामीलाई केही स्वयंसेवकहरुको आवश्यकता छ’ । बिभिन्न ठाउबाट सहयोग रकम संकलन भईरहेपनि निकै ढिला गरि सहयोग आईरहेको उनले बताए । सहयोगीहरु बढिरहेपनि आफुहरुसंग बस्ती निर्माणका लागी लामो समय नभएकाले उनले सहयोग गर्न चाहने सबैलार्ई सक्दो सहयोग गर्नका लागी आग्रह समेत गरेका छन् ।


फउण्डेसनले बस्ती निर्माणका लागी ४ करोड ७८ लाख लागत अनुमान गरेपनि हालसम्म फउण्डेसनलाई २ करोड ५८ लाखको हाराहारीमा सहयोग प्राप्त भएको छ । फउण्डेसनका लेखा अधिकृत सरोज जंग खत्रीका अनुसार बस्ती निर्माणका लागी अझै पनि २ करोड बढी रकम आबश्यकता छ । ४२ दिनमा ५० प्रतिशत काम भएको नमुना बस्तीका लागी फाउण्डेसनले अहिलेसम्म २ करोडको हाराहारीमा खर्च गरिसकेको छ । १ करोड ५० लाखको हाराहारीमा खर्च भईसकेको र निर्माणका लागी खरिद गरीएका निर्माण सामाग्रीको बांकि रकम ५० लाख भन्दा बढी भने भुत्तानी गर्न बांकि रहेको छ ।